Махсус имкониятлар
Bugun yurtimizda aholini ijtimoiy muhofaza qilish masalasiga alohida e’tibor qaratilmoqda. Zero, amalga oshirilayotgan barcha islohotlar zamirida “Inson qadri uchun” g‘oyasi bosh omil bo‘lmoqda.
O‘zbekiston Respublikasi Vazirlar Mahkamasining 2021-yil 1-iyuldagi “Muhtoj shaxslarni protez-ortopediya moslamalari va reabilitatsiya qilishning texnik vositalari bilan ta’minlash tartibi to‘g‘risidagi nizomni tasdiqlash haqida”gi 411-sonli Qaroriga muvofiq, Bulung‘ur tumanida ham amaliy ishlar olib borilmoqda. Xususan, bugun Bulung‘ur tumani Suluvqo‘rg‘on mahallasi fuqarosi Sh.S.ga elektr yuritmali kreslo-aravacha topshirildi.
Bulung‘ur tumani hokimi Samandar Astonov, tuman prokurori S.Saidov hamda Bulung‘ur tumani Tibbiy-ijtimoiy xizmatlarni rivojlantirish bo‘limi rahbariyati aravachani topshirish maqsadida Sh.S.ning xonadonida bo‘lib, dildan suhbat qurishdi. E'tiborlisi, ushbu aravacha foydalanish uchun nihoyatda qulay bo‘lib, pult yordamida boshqariladi.
Shuningdek, tumanning Qirqshodi mahallasi fuqarosi, 1-guruh nogironi Q.Q.ga hamda Sohibkor mahallasining nafaqa yoshidagi fuqarosi A.R.ga ham nogironlik aravachasi topshirildi.
Ma’lmuot uchun, 2021-yilda fuqarolarning ehtiyojiga ko‘ra, jami 52 ta nogironlik aravachalari, 10 ta eshitish moslamasi, 24 ta qo‘ltiqtayoq, 30 ta hassatayoq, 50 ta protez ortopedik mahsulotlari berilgan, 12 ta yakka-yolg‘iz yashovchi fuqarolarning uylari homiylik mablag‘lari hisobidan to‘liq ta’mirlangan.
Bulung‘ur tumani Tibbiy-ijtimoiy xizmatlarni rivojlantirish bo‘limi bshlig‘i Ravshan Muxtorov ta’kidlaganidek, O‘zbekiston Respublikasi Vazirlar Mahkamasining 2015-yil 10-avgustdagi “Keksalar va nogironlarni manzilli ijtimoiy himoya qilish va qo‘llab-quvvatlashni yanada kuchaytirish chora-tadbirlari to‘g‘risida”gi 237-sonli Qaroriga muvofiq, tumanda 76 nafar yakka-yolg‘iz fuqarolar hisobga olingan. Ularga bo‘lim tomonidan 9 nafar ijtimoiy xodimlar biriktirilgan bo‘lib, yil davomida ijtimoiy xizmat ko‘rsatilib kelinmoqda.
