Ўқитувчиларимиз учун ажойиб янгилик!

Эндиликда ўқитувчилар тўлдирадиган ҳужжатлари сони битта билан чекланади – фақат синф журнали тўлдиришади! Бу ҳақда Самарқанд вилоят халқ таълими бошқармаси ахборот хизмати хабар бермоқда.

 

Ўқитувчиларнинг педагогик юкламасини оптималлаштириш, уларни асосий юкламадан ташқари бошқа ҳисоботлар ва ортиқча қоғозбозлик ишларидан озод қилиш ҳамда педагогиканинг мазмунига кўпроқ вақт ажратишлари мақсадида “Умумий ўрта таълим муассасаларининг педагогик мутахассисликлари бўйича намунавий йиллик иш режасини шакллантириш тартиби тўғрисидаги йўриқнома”га ўзгартириш киритилди (Адлия вазирлигидан 2020 йил 29 июнда 3058-I рақам билан руйхатдан ўтказилди).

 

Бунда, умумтаълим мактабларининг ўқитувчилари томонидан юритиладиган ҳужжатлар сони БИТТАГАЧА (синф журнали (жумладан, электрон равишда kundalik.com тизими орқали) қисқартирилди. 

 

Барча мактабларда фанлар бўйича тақвим мавзуий режаларини бир хиллаштириш мақсадида, эндиликда тақвим мавзуий режалар Республика таълим маркази томонидан тасдиқланади ва ўқув йили олдидан вазирликнинг расмий веб-сайтларига жойлаштирилади.

 

Юқорида таъкидлаб ўтилган Давлат дастурига мувофиқ ишлаб чиқилиб амалиётга жорий этилиши кутилаётган “Миллий ўқув дастури”нинг асосий компонентлари доирасида барча фанлардан “Ўқитувчи китоби”ни  жорий этилиши мактаб ўқитувчиларининг дарс ишланмаси (конспект)нинг ўрнини тўлдиради.

 

Босқичма-босқич ўқитувчилар ва мактаб жамоаси фаолияти хужжатларни тўлдиришига қараб эмас, балки мактаб битирувчиларининг ҳаётда муваффақиятга эришишлари билан баҳоланишга ўтилади, дейилади хабарда.

2015-2024 © Булунғур туман ҳокимлиги. Сайт яратувчиси: SAKTRM